21/08/2009

播放本新聞相關短片

加納特×車仔出鞋搵銀

本文重點
電影《食神》話:「瀨尿蝦同牛丸溝埋做瀨尿牛丸吖笨!」估唔到車路士一樣係咁有諗頭,將足球同籃球都溝得埋,同NBA塞爾特人巨星加納特推出以車仔藍做主色嘅「TS Commander LT」籃球鞋,仲跟多條特別版頸巾,兼件印有加納特名字嘅車仔波衫,打包賣成2,100蚊港紙,呢個月底喺美國推出,「車」迷今勻真開心囉!

香港冇得買

NBA有唔少巨星好似高比拜仁同拿殊都係瘋狂足球迷,其實加納特都一樣,早排趁住車仔喺美國進行季前之旅,佢仲同車仔傾掂合作協議,大玩Crossover,創意勁到你唔信。當中對特製籃球戰靴,除咗話以車仔傳統藍色做主色,黃色鞋舌仲會印上車仔隊徽添。

各位「車」迷或者「加」迷想入貨?得!去美國啦,皆因成個Package只會由今個月29日起,喺美國波士頓嘅潮店Bodega先有得賣。至於話想單買對籃球鞋?11月1日美國全國有得賣,話唔定遲啲香港都有得炒番對啩!