3年前適逢馬會舉行招聘會，加上受到Amy拉攏，羅承恩成功「棄艇投馬」，用雙手創造另一番事業：「我本身對馬匹一無所知，但向來鍾意小動物，屋企養咗好多貓貓狗狗，而且爸爸以前做象牙生意，由細到大『揸開架生』搵食，所以最初學釘甲都容易上手啲。」

駐守沙田不斷進修

每日返「朝八晚五」的「肥貓」，主要職責是替馬匹脫除蹄甲及修剪馬蹄，然後將適合的蹄甲釘配在馬蹄上，他慶幸以往做過運動員，才有足夠體力應付日常工作：「幫一隻馬釘甲平均要30至45分鐘，過程要用好大氣力，少啲體能都唔掂，以前做見習嗰陣就見過唔少師兄弟頂唔順，半途離職。」

李裕昌丘震宇想做師傅

現已晉升為二級釘甲匠的羅承恩，駐守上水雙魚河2年多之後，最近被調到沙田馬場工作，壓力大為增加，他解釋謂：「上水啲馬係馬術馬，馬腳損耗冇咁大，就算釘錯甲或者揀唔啱馬蹄，後果都冇咁嚴重，但係依家『服侍』嘅全部都屬競賽馬，錯嘢真係可大可小，大吉利是講，如果隻馬跑斷腳，身價閒閒哋幾百萬，點擔當得起呀！」

為增加對馬匹的認識，以及加強跟獸醫（釘甲匠屬馬會獸醫部）的溝通，「肥貓」需要不斷修讀有關課程：「我留意多咗賽馬資訊，見到曾經畀自己釘甲嘅馬跑贏，成功感好大。」在羅承恩介紹下，兩位前划艇港將李裕昌及丘震宇於去年12月都成為見習釘甲匠，兩人對工作前途皆充滿憧憬，更盼望有朝一日做到「師傅級」收徒弟呢！