獨木舟運動員出身的朱偉豪，與Amy同年（06年）考入馬會，原本想做策騎員，惟因太高而落選，結果任職馬房助理（俗稱馬伕），「阿豪」坦言照顧馬匹殊不簡單，辛苦又污糟，但眼見牠們跑贏比賽卻與有榮焉，相當有滿足感。

原本對賽馬一無所知、亦全無興趣的「阿豪」，回想起最初要跟身軀龐大的馬匹「朝夕相對」，的確感到「心慌慌」；「雖然自己都鍾意小動物，但係佢哋咁大隻，以前又未接觸過，點都會有少少驚。」

作為馬匹保母，獨力照料三匹馬的「阿豪」，每日工作時間由凌晨4:00至10:00、下午2:00至5:00，開工第一件事要幫馬匹探熱，然後「執床」（即清理馬倉大小二便）、清潔馬身、佩鞍、拉馬去晨操、收馬、落鞍、沖涼……認真忙到無停手。

爭取升職做領班

「做呢份工最緊要係唔怕污糟，我花咗成大半年先至適應到。」「阿豪」表示縱然辛苦，但從未想過放棄：「呢啲就係運動員特質，唔輸得！其實，同隻馬相處耐咗都會培養出感情，一樣有溝通，見到佢哋跑頭馬，我都好開心。」

球員踢波望加盟大球會，做「馬伕」同樣想做「大馬房」；考獲二級證書的「阿豪」現時在大摩（約翰摩亞）馬房工作，絕對是泊到好「馬」頭，他坦承除盼賺取更多獎金外，還會努力爭取升職：「做馬房領班係我最大目標。」