Chapter 1：「開荒牛」……
身兼兩職 學騎馬4天速成
「對人」，是陳念慈（Amy）的強項，當年在比賽場上面對觀眾從不怯場，結束運動員生涯後當老師，又是對着一班又一班的學生，隨後轉到香港體育學院工作，先後任職商務統籌經理及運動員事務經理，對象也是各大商家和不同項目的運動員。
直至3年前，這位「湊」大不少港將的保母決定放下一班「囝囝囡囡」，走到毗鄰的香港賽馬會擔任見習騎師學校校長及賽馬人才發展經理，「任務」就是提拔人才。
赴愛爾蘭取經
「的確係好大嘅挑戰，對我亦係新嘗試，以前馬會只設見習騎師學校校長職位，冇人才發展經理，所以工作範圍好大，亦好似『摸住石頭過河』，不過做『開荒牛』有樣好，至少無比較。」不經不覺，本周五（7月10日）已是Amy上任3周年紀念。
作為一校之長，Amy上任前當然做足「功課」，事關以往沉醉於運動圈子的她，對這種跑得快的四腳動物甚少留意，她搜集很多外國資料，又細閱著名世界級騎師的成名路歷程，更專程赴愛爾蘭見習騎術學校參觀兼學騎馬，要在四天內學速成班，一天試騎兩次，期望可盡快了解有關自己工作的知識。
Chapter 2：困難……
以誠待人 唔怕挑戰
由於過去歷任校長處事作風都差不多，這個「女管家」一上任就要「左改右改」，無疑會令部分老（資格）學員對新制度感到抗拒，Amy憶述：「我知返工頭幾日，好多人想刺激我，有啲前輩亦向我潑冷水，但我份人愈受刺激就更加要做到，結果花咗兩個禮拜就已經同其他人磨合好，其實，我覺得『以人為本』係重要環節，只要用心對人對事，就可以解決問題。」
至於陳念慈另一個「任務」就是提升馬會職員質素，讓員工的專業獲得肯定，所以她安排了不同的課程及考試，增強各人認受性，即使離開馬會，其專業也能獲世界認可。
Chapter 3：改革……
踢走舊思想 勒令學員進修
過去30多年來，香港馬會見習騎師學校都予人神秘感覺，事關以往的見習騎師多採師徒制，加上怕年紀尚小的見習騎師受到外界引誘，於是把這批未來之星盡量與外界隔離。
不過，成為史上首位女校長後，Amy就要將神秘面紗揭開：「我畀佢哋嚇呆咗，點解唔可以光明正大？怕佢哋受金錢誘惑就要教，我記得上任第一件事就係喺辦公室門口整番個學校門牌，我要全世界人都知道呢度有呢間學校，唔可以鬼鬼祟祟。」
蔡明紹楊啟棠成功個案
Amy不諱言學校有很多陋習需要更改，有成功騎師光輝歲月的同時，也有很多不為人知的潦倒個案，她「勒令」所有學員必需要裝備自己：「如果裝備好自己，就算唔做運動員一樣有作為，所以我要見習騎師修讀課程，中文、英文、馬房知識、財務管理同運動科學，兼且英文要考公開試。」見習騎師過往每天只顧練習，今天陳校長就要他們「讀得又騎得」。
事實上，Amy的努力也得到回報，原本正在海外受訓的蔡明紹，今年被重召回港，單是半季已贏得43場頭馬，另一個令她欣喜的，是剛畢業的楊啟棠赴澳洲升讀大學：「每個人都有夢想，楊啟棠中三就嚟呢度，辛苦咗十年終於畢業做騎師，可以搵真銀，但佢都甘願放棄，我都好意外。我成日話只要裝備好自己，路，一定會掌握喺自己手上。」
Chapter 4：收成……
引薦運動員入馬會
既然是運動員出身，Amy坦承仍「心繫體育」，因此她入職後亦引進其他運動員加入馬會工作：「自己喺體育圈咁多年，主要發展人才培訓，千里馬常見，但伯樂卻不常有，見到一啲職位空缺，我好快會諗起佢哋（運動員），喺體院嗰陣都已經有個心願，希望為佢哋安排讀書，有機會就搵到大機構聘請，依家都算實現咗自己夢想。」不過，Amy強調每位運動員入職都要經過評選，絕非「靠人事、走捷徑」。
Chapter 5：展望……
追尋理想 無關博彩
馬會在港雖是合法博彩機構，但陳念慈眼中的學員，甚至是頂級騎師都同樣是運動員：「我唔推廣賭博，但點解我會安排中小學生嚟呢度參觀呢？係因為我想所有人都知道呢班學員，同好多運動員一樣係要付出好多，呢班年輕人朝朝凌晨3點半起身，都係為追尋自己嘅理想，我覺得呢個訊息好正面。呢個世界好多運動都有得賭，羽毛球冇咩？講到底，我好Proud of 呢份工作。」
認識Amy
‧75至83年連奪九屆全港賽女單冠軍。
‧78年亞洲青少年賽女子單打冠軍。
‧79年世界賽混雙冠軍（夥拍吳俊盛）。
‧88年漢城奧運會混雙銅牌（夥拍陳智才）。
‧90年英聯邦運動會混雙金牌（夥拍陳智才）。
‧91年獲港英政府頒贈BEM大英帝國勳章，成為首位女運動員取得此項榮譽。
‧95年當選香港10大傑出青年。