日前先同意加盟拓荒者嘅土耳其球星陶告魯，尋日突然轉軚，宣布改投多倫多速龍，據講全因為老婆嘅意見。有指速龍今次盡地一煲，以5年合共5,300萬美元（約4億港元）簽陶告魯，或會放棄馬利安等3名星級球員騰出薪酬空間！

積遜唔退休

今季狀態大勇，幫魔術取得NBA總亞軍嘅陶告魯，早前宣布唔同魔術續約成為自由身，希望喺退休前賺取一份天價合約。本來呢名土耳其球星已初步同意以5年5,000萬美元（約3.9億港元）簽拓荒者，但隨住速龍提出更高嘅人工，最終令陶告魯轉軚。但據美國《ESPN》爆料，其實陶告魯之所以改變初衷，全因為佢老婆覺得多倫多比起波特蘭，係一個更歐洲化嘅國際城市，住咗好多土耳其人，加上成家人住喺東岸已經有5年，所以決定唔去西岸加盟拓荒者。不過速龍為咗簽陶告魯，犧牲亦唔細，據講將會忍痛放走馬利安、安東尼柏加同迪芬奴3名主力，騰出薪酬空間嚟簽陶告魯。

另外，早前因健康問題一度傳出會提早退休嘅湖人教練積遜，同醫生商量後，尋日喺湖人官網宣布下季將會繼續執教湖人：「我好有信心自己可以帶領湖人應付另一個漫長嘅球季。」