珊：李麗珊/森：黃德森

【工作時間】

珊：做運動員嗰陣時好有規律，依家Weekday起碼都「朝6晚11」，每晚頂多瞓4、5個鐘，仲要打散嚟瞓。

森：以前做教練「朝9晚7」，家陣平均都要「朝9晚10」，有時開OT仲會做到11點幾添，休息時間自然少好多。

【體重體能】

珊：體重同以前差不多，但係肌肉就明顯少好多，就連體能都差埋。

森：無論體重同身形，都由輕量級變成重量級；至於體能更下降咗40%，慘！

【對手】

珊：以前比賽對手約十幾人，依家雖然只得2個（女），但一啲都唔易「應付」。

森：呢份工要同好多階層人士接觸，久唔久仲需要面對公眾，數數埋埋，家陣「對手（對象）」都過百人㗎！

【性格】

珊：以前份人好「尖」、好「倔」、性急又火爆，決定去做一樣嘢就唔會理人哋感受。依家？收晒火啦，仲要睇兩個女面色添！哈哈……講笑、講笑！不過性格真係變咗好多，凡事都會睇多幾面，聽人意見，學識喺適當時候妥協，而且有耐性咗好多。

森：冇做教練嗰陣咁易躁同衝動，脾氣好咗，連EQ都好埋，更重要嘅係每件事都會用唔同角度去睇，睇得透徹啲，先去做總結或者提出意見。

【目標】

珊：運動員年代最想贏冠軍；依家當然希望兩個女生活得健康快樂，不過呢個目標一啲都唔簡單，因為有太多嘢唔到我控制。

森：以前只係諗點去爭三甲名次；依家就希望幫到班香港運動員喺冇後顧之憂下延續運動生涯。