珊珊金牌選手變囡囡奴隸獸

運動員時代的李麗珊，個人字典中絕對不會有「屈服」、「認輸」等字眼，但這位昔日體壇女強人，今天卻可「低聲下氣」、「任勞任怨」，甘願為兩個寶貝女充當「奴隸獸」，24小時On call做全職媽媽，儘管比當運動員辛苦好幾倍，但她形容換來的喜悅卻是用錢也買不到的。

生多個女 1+1=阿四

脫下戰袍多年，「風之后」並不如一般運動員退休後「中年發福」，反而比起當運動員時更消瘦，皆因兩個女兒已將她的體力及時間完全消耗，每天早上6時起床，照顧女兒飯餐、梳洗、睡覺，接送返學、放學，參加課外活動、做功課……全由「珊珊」一腳踢，「戰」至晚上最早也要11時才休息。「兩個女嘅日常生活照顧，我都要由自己負責，一方面會安心，另一方面我希望同佢哋一齊成長。坦白講，真係好辛苦，每晚好彩嘅話先可以唔間斷瞓四、五個鐘，但我覺得一切都係值得嘅。」

由於「珊珊」本身來自大家庭，李氏共有十兄弟姊妹，因此她不希望大女兒孤獨生活及成長，故兩年前決定再懷孕並誕下幼女，惟這位久經沙場的「老手」發夢都沒想過，多一個孩子所花的時間及精力絕非「Double咁簡單」，起碼都多4、5倍：「1+1唔係等於2，係等於『阿四』」。這絕對是繼「香港運動員唔係垃圾」，以及「依家生個BB要400萬」之後，「珊珊」的另一經典「金句」。

湊女一腳踢冇私人時間

「我真係無諗過多一個小朋友，要花多唔止一倍嘅精力，講真，我依家私人時間近乎零，有時要出席一啲廣告活動，就要動員好多人手，雖然有工人協助，但都要搵細妹、家姐幫手，對住兩個小豆丁要有成Team人back up，完全發揮Team Work威力。」雖然「珊珊」不停訴說如何辛苦、吃力，但嘴邊卻不時流露甜絲絲笑容，她不諱言：「點都好，都係開心嘅，我從來冇後悔過（生兩個）。」

對於兩個愛女的期望，「珊珊」不消一秒吐出真言：「我只希望佢哋開心、快樂成長，唔好以為講得好簡單，要做到呢啲元素真係唔易，唉！依家仲邊有『望子（女）成龍』呢套吖，嘥氣啦！」