奧尼爾加盟騎士？你冇睇錯！美國《ESPN》尋日大爆効力太陽嘅「巨無霸」奧尼爾已經同騎士傾掂數，來季將會空降克利夫蘭，同「大帝」勒邦占士組成夢幻拍檔！

據《ESPN》報道，騎士今次係用賓華萊士、柏夫洛域、嚟緊一個第46位嘅選秀權，再加50萬美元嚟交換奧尼爾。咪睇「巨無霸」家陣37歲，上季効力太陽每場平均仍然有17.8分同8.4個籃板，其實騎士買奧尼爾嘅目的好簡單，就係希望加強內線能力，對付好似魔術杜域侯活呢類力量型中鋒，輔助「大帝」取得首個NBA總冠軍。

姚明復出無期

太陽今次送走奧尼爾，已經慳番900萬美元人工，如果換番嚟嘅賓華萊士選擇退休，太陽將可以再慳多700萬美元，似乎想重組球隊。至於火箭中鋒姚明，早前喺季後賽對湖人受傷後，本來預計只需要抖8至12個禮拜，點知火箭軍醫尋日卻證實姚明嘅傷勢唔多樂觀，復出無期，能否趕及喺新球季上陣，仍然係未知之數。