雖然加入傳媒界只有短短2年時間，不過Wings已經見過碧咸同埋姚明這種體壇巨星，更有機會與他們「合照」，難怪Wings笑言：「就算退休都無憾啦！」
記：記者 W：Wings
見到碧咸……
記：做體記（體育記者）最大收穫係乜？
W：梗係見到碧咸啦！上次皇馬嚟香港我買唔到飛入場，以為呢世都冇機會見到佢啦！幾失望呀！好彩，入咗行之後撞啱銀河訪港，終於「失而復得」，有機會近距離見到碧咸，同事仲講笑咁話我可以退休添！不過唔可以同佢做專訪，又拎唔到佢嘅簽名就可惜啲囉。
姚明？唉……
記：聽講你都見過姚明喎！
W：唉，唔好提喇。嗰次去澳門採訪佢，之前一晚自己都好緊張，驚我問啲問題太尖銳佢唔識答，又驚自己細粒得滯佢見我唔到，準備咗好耐，最後佢竟然直行直過，當所有記者無到，真係激死。
白做……
記：入咗行之後，除咗姚明，仲有冇嘢令你唔開心呢？
W：好多行家都對我好好，冇咩人令我唔開心喎！不過有一次喺國內做環南中單車賽，因為上網線路問題，趕唔切傳片返公司，做咗成日嘢好似浪費咗咁，我諗呢次係我做體記咁耐，最唔開心嘅一次囉。
最想做嘅大賽……
記：有冇咩大賽最想做呢？
W：我想現場做一次F1呀！上次新加坡我本來好想去，不過公司總部喺正嗰度，加上人手充裕，最終梗係唔使我幫手啦。
等香港搞F1……
記：咁咪要等到香港搞F1先有機會？
W：其實香港政府真係可以諗諗吖，好似澳門咁，一定可以帶旺旅遊業。唔好以為賽車係飛仔運動，我去過意大利，嗰度啲觀眾係着晒西裝入場睇比賽，係好高尚嘅一項運動。以我所知，以前賽車界都有啲師兄爭取過，不過政府最終都係唔批，希望遲啲有機會喇！