Wings生長於小康之家，家住又一村的她是家中獨女，自小已得到家人溺愛。由於爸爸是小型賽車發燒友，Wings自小已接觸這項極為男性化的運動。「細細個已經同Daddy去深圳同東莞睇佢比賽，到我15歲嗰陣，佢就叫我不如試吓玩埋一份。」Wings當時也在學習打羽毛球及溜冰，但當感受過賽車帶來的速度感後，鄧穎詩坦言，已即時愛上這玩意。
請肥仔食塵最有成功感
「當時淨係得我一個女仔玩，雖然周圍都有好多奇異目光，但自己未驚過。最記得就係啱啱玩嗰陣唔識控制架車，喺跑道上面打圈同死火，有個肥仔竟然向我Daddy投訴。當時我就下定決心，一定要練好啲，唔可以輸畀佢。」
努力總會有回報，之後Wings在一次比賽中，將肥仔遠遠甩在後面，她自豪地說：「之後佢每次見到我都頭Dup Dup，哈！」就是這份成功感，令她立志將興趣變成職業。
17歲加盟F3000車隊
02年，意大利車隊Euro 3000 Racing Team到中國物色車手培訓，結果年僅17歲的Wings與另外兩名國內男車手同獲看中，被送到意大利訓練了2個月，當時她更決定停學1年接受新挑戰。同年也曾參加澳門格蘭披治賽雷諾方程式2000賽事，在同齡車手中名列第一。
沙士爆發被迫放棄賽車
原本有機會成為F1車手的Wings，卻於03年遇上沙士爆發，全球賽車運動被迫取消，同時，她卻獲港大新聞系收錄，與其無了期地等，倒不如學點東西充實自己。最終，鄧穎詩選擇了學業，向另一個目標進發。「其實我成日都有機會接觸記者，我覺得呢份職業好似好得意咁，加上自己又貪玩，對朝九晚五嘅辦公室生活完全冇興趣，於是畢業之後，就加入ESPN做體育記者嘞。」
轉任記者從頭學起
由賽車轉戰傳媒界，Wings一切都要從頭學起，有時完成採訪後，她更要兼任剪片工作，沉重的負擔一度令她手忙腳亂，不過鄧穎詩有的，便是不服輸的鬥志：「以前讀書如果唔識做功課，就會發脾氣，掟埋一邊唔做。不過自從做咗車手之後，我知道有困難一定要克服，唔可以逃避。如果唔夠人用，我做埋剪片又有乜所謂！」