本文重點
為咗慶祝奪得球會史上第十五個NBA總冠軍，湖人尋日喺洛杉磯舉行冠軍大巡遊。由於已經七年冇威過，據報多達十萬名球迷出席。湖人主將高比拜仁同孫悅最後更加喺洛杉磯紀念大球場同球迷載歌載舞，場面非常熱鬧。
高比孫悅齊跳舞
由於市政府欠債纍纍，湖人冠軍大巡遊早排一度被傳搞唔成，但隨住好多私人機構捐錢後，最後終於籌到二百萬美元，喺尋日當地朝早八點舉行，湖人球員坐住雙層巴士喺斯坦普斯球場出發駛去洛杉磯紀念大球場，沿途不停獲球迷英雄式歡呼致敬。據報可以容納95,000人嘅洛杉磯紀念大球場，早喺前一晚已經有球迷排隊，差唔多未天光已經爆棚，湖人球員入場後輪流發表講話，最後高比拜仁同孫悅更加即席跳舞，搞到球迷熱血沸騰。
由於湖人球迷之前曾經搞過事，當地警方足足派咗1,700名工作人員去維持秩序。其實湖人喺00、01同02年都曾經搞過類似嘅勝利大巡遊，但氣氛及球迷嘅人數同今次差天共地，高比解釋：「今次勝利大巡遊特別好多，因為我哋已經黑仔咗好多年。」