形象好，自然多人鍾意！瑞士球王費達拿近年以淡定優雅形象示人，唔止攻陷女球迷芳心，仲令自己成為廣告商寵兒，但大家又知唔知原來費達拿都有狂野之時？初出道嘅佢一頭凌亂長髮再加上滿面鬚根，狂野指數直逼佢嘅網壇老友拿度！

根據《福布斯》統計，費達拿喺08年總收入高達3,300萬美元，當中除咗比賽獎金之外，廣告收入亦係另一大來源！事實上，費達拿近年都以青靚白淨Look配合溫文爾雅微笑示人，親切感大增自然深受廣告商追捧，除咗球拍波鞋等運動商品之外，好似剃鬚刀同名貴手錶等唔同種類產品亦以費天王作代言人，真正愈斯文愈搵銀！

鍾意變「髮」紮辮仔

不過費達拿並非由始至終都係玩優雅Look㗎，其實早年出道嘅佢亦充斥住一浸波牛味，特別係佢留有一把長髮，雖然每逢比賽時候都會紮起，希望畀到大家整齊嘅感覺，可惜效果同我哋香港個四哥似乎相差無幾咁喎！

其實費達拿向來鍾意變「髮」，例如佢試過將長髮電鬈，再加上當時留有滿面鬚根，令到成個人野性指數爆晒燈！佢亦曾經留過One Length頭，無奈五官線條太粗糙，令兩者格格不入，所以講嚟講去，都係依家嘅Look最好！