兼顧訓練飲食狀態上巔峰

高比拜仁想繼承「波神」之位，首先梗係擊敗魔術贏得NBA總冠軍，贏取佢個人嘅第四隻冠軍指環。為咗實現夢想，原來高比仔去年十一月搵咗曾經同米高佐敦合作嘅私人健身教練哥路華，每星期由芝加哥飛去洛杉磯幫佢訓練一、兩次，遇有大戰來臨再加操。事實上，哥路華無論上至訓練，下至飲食營養學都一一兼顧，務求將高比嘅狀態推上最高峰。高比仔對於哥路華讚不絕口：「我只要按照佢嘅建議去做，身體就會感覺好好。」

哥路華二十四歲起同米高佐敦合作，兩人十五年間贏得無數冠軍，係「波神」背後嘅重要支柱。依家喺哥路華個健身團隊幫襯嘅客人，除咗高比外，仲有韋迪等頂級運動員，見佢哋終日喺球場滿場飛全無疲態，就知哥路華嘅作用，今朝「小飛俠」高比又會喺總決賽次回合率領湖人主場硬撼魔術，想睇高比表演？千祈咪走雞。（now670、有線165、廣東體育及中央5台周一早上8:00直播）