喺今屆季後賽表現飄忽嘅高比拜仁，尋日一到總決賽終於打真軍，攻入個人總決賽得分新高嘅40分，帶領湖人Game1主場以100:75大勝魔術，為湖人爭取第15座NBA總冠軍打下穩固嘅基石。

沉寂咗成個季後賽嘅高比拜仁，尋日嘅表現簡直就好似猛虎出柙，當中喺第3節更加射入18分，一度帶領湖人拋離28分，最終全場取得40分、8個籃板同8個助攻，創出個人總決賽得分新高，並同米高佐敦等3位名將睇齊。賽後高比表示自己之所以咁搏，全因為好想攞到第四枚冠軍指環：「我真係好想再攞NBA總冠軍！」

侯活入得一球

湖人尋日之所以取得大勝，有賴全隊出色嘅防守，經常以兩至三人夾擊杜域侯活，令「魔獸」全場只入得一球，靠罰球加埋先得12分，其餘外圍射手全場射23個三分只入得8個，全隊命中率唔夠三成，難怪就算有後衞尼爾遜養傷4個月後復出，亦以25分大敗，呢個亦係總決賽史上首戰第6大得分差距。

湖人成功旗開得勝，對佢哋爭標形勢嚟講可謂一個好兆頭，事關積遜教練以往43次喺季後賽階段，帶領球隊取得每個系列賽嘅第一場勝利，最終都可以淘汰對手，不過高比拜仁仍然警告隊友唔好鬆懈：「魔術係一支好有韌力嘅球隊，佢哋之前已經有好多次喺劣勢下成功反彈嘅案例。我哋一定要忘記今場勝利，繼續前進。」總決賽第二回合將會喺香港時間星期一朝早繼續喺湖人主場舉行。

高比拜仁過檔紐約人？

著名遊戲商2K Sports為咗慶祝暢銷遊戲《2K》系列嚟緊踏入十周年，尋日特別喺比賽期間出30秒廣告，宣布高比拜仁將會成為《2K10》嘅封面，仲畀四個封面畀球迷投票決定，最估唔到係除咗有三個高比著湖人嘅pose畀大家揀外，竟然有一個高比着紐約人17號波衫嘅封面畀大家揀，大家由即日起可以上www.2ksports.com進行投票！