04/06/2009

播放本新聞相關短片

湖人魔術王者爭霸

Mission Impossible!萬眾期待嘅NBA總決賽聽日就會正式Tip Off,雖然高比拜仁已經有三枚冠軍指環在手,但全部都係喺奧尼爾輔助下取得。究竟「小飛俠」今次可唔可以走出奧尼爾嘅陰影,靠自己首次奪標?定還是魔術繼上圈淘汰騎士後再創神話?湖人特攻隊可唔可以完成三大Mission,將會係勝負關鍵!

Mission 13分王劉易斯威脅大

加素出外線封殺高射炮

喺NBA射三分嘅高手,通常都係較矮嘅球員,或者係後衞,偏偏魔術嘅三分王,卻係身高達六呎十嘅劉易斯,為咗防範佢嘅三分,湖人教練積遜表示將會派加素走出外線封殺劉易斯嘅高射炮。

220次入3分冠絕聯盟

身高達六呎十嘅劉易斯,雖然司職大前鋒,不過佢嘅強項卻係三分,喺常規賽,三分命中率就高達39.7%,220次射入三分波更加冠絕聯盟。為咗防守呢名「怪獸」,湖人球星加素表示將會走出外線防守佢:「聯盟中絕大部分大前鋒都只會喺十五到十八呎嘅範圍內射波,但劉易斯卻會跑出三分線外,你一定要了解劉易斯嘅波路,針對佢改變自己嘅腳部移動。希望通過呢幾日嘅訓練,我可以習慣佢嘅打法,確保唔畀佢喺比賽中獲得輕鬆射波嘅機會。」

事實上,加素身高達到七呎,即管睇吓佢可唔可利用身高優勢同長臂干擾劉易斯射波,彌補自己腳步同速度上嘅劣勢,扶助高比拜仁攞總冠軍。

Mission 2得分王尼爾遜復出

「小飛俠」揚言Mark到實

雖然唔使直接硬撼杜域侯活,不過高比拜仁嚟緊喺總決賽,隨時面對更加嚴峻嘅考驗!事關原本提早收咧嘅魔術明星級後衞尼爾遜,最近成功復出,高比仔已表示將會全力提防呢位得分王。

兩對湖人轟入55分

魔術後衞尼爾遜喺今季常規賽上半段有神勇嘅演出,最後更加首次入選東岸明星隊,可惜喺賽前不幸重創,本來預計提早收咧,但尼爾遜嘅康復程度卻比預期中快,日前傷愈後首次參加球隊嘅訓練,更加兩度以技術扭過季中加盟代替佢打正選嘅艾斯頓,尼爾遜本人對聽日上陣好有信心:「我唔係想話自己比其他人叻,但有時我可以做出一啲能人所不能嘅事。」

難怪湖人主將高比拜仁賽前亦表示會全力嚴防尼爾遜隨時復出:「如果尼爾遜復出,魔術又多一名得分武器。魔術隊中唔係冇射手,但尼爾遜係你喺防守時必須格外留心嘅球員。」事實上,又唔怪得高比仔咁驚嘅,事關魔術今季喺常規賽兩對湖人,兩仗球隊最高得分球員都係尼爾遜,合共轟入55分,高比仔Mark唔Mark得住尼爾遜,相信會係湖人爭標嘅另一關鍵。

Mission 3大隻佬拜林擔正

車輪戰打殘杜域侯活

湖人今次對魔術嘅最大敵人,唔使講一定係「魔獸」杜域侯活。為咗將「魔獸」嘅威力減至最低,教練積遜表示將會使用車輪戰戰術,輪流派人緊盯消耗「魔獸」嘅體力,當中拜林會率先擔正。

力讚「魔獸」勁過姚明

杜域侯活喺今屆季後賽大熟大勇,經常以一己之力爆入籃底得分,湖人教練積遜深明侯活將會係佢哋爭標嘅最大障礙,日前表示將會運用車輪戰對付佢:「我哋有三個身高體壯嘅球員,都可以用嚟對付杜域侯活。」呢三個球員,分別係拜林、奧當同米本加,其中拜林更被欽點為正選,首先打頭陣對付「魔獸」。

對於對付杜域侯活,拜林表示已經諗好方法:「同杜域侯活交手,你一定要想辦法避免犯規。唔可以次次都用膊頭去撞佢,或者去干擾佢,應該用身體將佢限制喺罰球線附近,絕對唔可以畀佢喺三秒區攞到位。我覺得杜域侯活仲勁過姚明,因為佢夠晒高大,而且仲有好強嘅彈跳力,同時跑得好快,所以我一定會提高回防嘅速度。」