勒邦占士同高比拜仁，可以話當今NBA最有號召力嘅球星。早前美國ESPN進行調查，結果有86.7%嘅美國球迷希望睇到勒邦占士同高比拜仁喺總決賽交手，可惜占士竟然爆冷提早畢業，傷心嘅，唔單止球迷，仲有占士嘅廣告商，話說NIKE本來諗住喺總決賽全球同步推出公仔版高比對占士嘅廣告，另外可口可樂公司亦一早整好咗兩大巨星對決嘅廣告，結果依家都胎死腹中。

冇咗占士，電視收視率亦肯定大受影響，ABC電視台估計今年總決賽30秒嘅廣告，冇可能好似上年塞爾特人對湖人咁，索價40萬美元，粗略估計，冇咗占士，NBA同占士嘅贊助商嘅損失，加埋肯定要以億計。

傳言球證將偏袒高比

由於冇咗占士，今屆NBA總決賽，可以話由高比拜仁一位超級球星撐起，尤其係對美國球迷，事關佢哋一直崇尚「個人英雄主義」，外間更傳言NBA為咗打造高比拜仁奪標嘅傳奇，將會叫球證特別照顧高比，即管睇吓魔術呢支「草根球隊」，可唔可以打破呢個潛在嘅規則。