與其繼續獨力苦苦支撐，何不相信團結就是力量？湖人球星高比拜仁（左圖）終於信任隊友，喺尋日朝對金塊嘅西岸決賽第五回合，畀隊友奧當同加素分擔得分工作，結果最後呢着奇招果然制勝，令湖人以103:94勝出，總場數領先3:2，距離總決賽只差一場勝仗！
湖人對金塊呢個系列賽相當激烈，之前總場數打成各二平手，結果尋日第五戰由湖人主場，雙方頭三節竟然全部打成平手，係NBA歷史上第四次出現嘅戲劇情況，最後湖人喺第四節發威先贏得比賽。
要講到湖人發威不得不提高比仔，佢今仗罕見咁只係起手13次，取得23分，但交出8次助攻，為隊友製造出大量投射機會。其中奧當就攞到19分同14個籃板，加素則有14分同10個籃板。高比仔賽後滿意咁話：「既然前幾個回合，佢哋都集中『嘜』我，我決定用自己做餌，為隊友製造更多空位。」
講番聽朝賽事，金塊會返到主場迎戰湖人，肯定唔會扯白旗投降。始終湖人近期表現都係略嫌反覆，金塊又有主場之利，主隊讓4.5分，上盤應該抵玩。