火爆Game3魔術「打」贏騎士

東岸決賽愈打愈激！尋日上演嘅第三回合，魔術同騎士喺場上打出真火，搞到球證「雞」聲不絕，騎士後衞莫威廉士更打到爆缸，最終魔術主場成功以99:89「打」贏騎士，總場數領先二比一。

由於首兩回合積落太多仇口，雙方今仗都極之粗野，一共出現86個罰球，58次個犯，兩次技術犯規同一次粗暴犯規，騎士主將莫威廉士（圖）更被魔術後備安東尼莊遜一(月爭)打中左眼爆缸，結果要縫四針，賽後騎士主將勒邦占士插安東尼莊遜打茅波！

莫威廉士	NBA季後賽周三賠率	周一戰果

火藥味濃莫威廉士爆缸

不過魔術嘅犯規戰術卻成功孤立勒邦占士，雖然「大帝」全場仍射入41分，但爆缸嘅莫威廉士、伊高斯卡斯同韋斯加埋射37次卻只得13中。反觀魔術得分就非常平均，全隊有五位球員得分達雙位數字，當中以「野獸」杜域侯活表現最好，取得24分同9個籃板，可惜佢今場又攞到技術犯規，喺今屆季後賽已經同高比拜仁一樣攞咗五次，再攞多兩次就要停賽一場。

魔術聽朝會喺主場再對騎士，相信勒邦占士同莫威廉士經過呢次「慘痛經歷」後，必定知恥近乎勇，何況騎士總場數落後一比二，再輸就差唔多Game Over，受讓1.5分下盤絕對可以一試。