本文重點
金塊破二十四年不勝魔咒！憑藉安東尼同比立斯合力轟入61分，金塊尋日作客以106:103擊敗湖人，中止連續十一次不敵湖人嘅悲慘歷史，總場數追成一比一，聽朝返番主場對湖人，可謂形勢大好。
安東尼高比齊創得分紀錄
其實尋日湖人對金塊嘅第二回合賽事，形勢上同第一回合好相似，雙方都咬得好緊，但唔同嘅係，金塊今次喺關鍵時刻終於冇犯錯，仲憑簡安馬田喺完場前29秒上籃得手，加上比立斯之後射入三個罰球，最終繼1985年後首次喺季後賽擊敗湖人。金塊今仗贏波功臣，首推安東尼同比立斯呢對孖寶，當中安東尼繼續有神勇演出，射入34分，成為球隊自1976年後，首位喺季後賽連續五場射入30分或以上嘅球員，至於比立斯則交出27分。
雖然湖人輸波，但其實整體表現唔曳，當中高比更加射入32分，喺季後賽累積攞到4,087分，超越名宿「天勾」渣巴，榮升湖人季後賽史上得分第二多球員，落後第一嘅謝利韋斯只有370分，遺憾係今場睇住湖人輸波，認真食龍肉都冇味。
聽朝金塊將會返番主場同湖人上演第三回合賽事，金塊經過首兩回合後，已經證明佢哋同湖人係有得打，加上金塊喺今屆季後賽主場戰績錄得六戰全勝佳績，依家初盤小讓4分，上盤有買趁早啦！