因為外貌突出被封為「外星人」嘅卡素爾，日前宣布結束十五年球員生涯後，立即表示將會跟隨前木狼教練桑達斯，出任巫師助教，展開NBA新一頁。
現年三十九歲嘅卡素爾，曾經効力NBA八支唔同嘅球隊，合共打過993場常規賽，每場平均攞15.7分同6次助攻，並且三度取得NBA總冠軍，分別喺九四同九五年嘅火箭，以及上季嘅塞爾特人。雖然佢日前宣布正式退休，不過大家下季喺NBA比賽中將會繼續見到佢，事關佢已經答應將會跟隨効力木狼時代嘅教練桑達斯，出任巫師助教。
卡素爾話：「經過十五年嘅NBA生涯，我實現咗好多球員嘅夢想，依家係時候進入教波階段，將我所學到嘅嘢傳畀下一代。巫師啲天才球員簡直滿瀉，我好開心可以喺呢度展開我嘅執教生涯。」