政客凍薪加津貼 物非所值最可悲

係咁嘅，行政會議日前通過獨立委員會建議，來屆立法會議員將會凍薪，繼續維持月薪九萬多元，醫療津貼亦唔會增加，不過其他津貼就大幅飆升，除咗議員辦事處營運開支津貼增加百分之七，由現時每年二百三十多萬元增至二百五十多萬元，開設辦事處及資訊科技開支津貼更勁升五成，由每屆任期二十五萬元增至三十七萬五千元，都幾和味o架。

係人都知，家陣經濟不景，連李超人都話係二十年來最差，打工仔可以保住飯碗已經偷笑，連政府部門都要奉行節約，偏偏立法會政客得天獨厚，唔到你唔服。港府話喎，立法會每年將增加五千六百萬元財政開支，納稅人被迫埋單，簡直冤哉枉也。

講真，如果政客為民請命，盡忠職守，莫講話增加津貼，即使調高人工，納稅人都心甘情願。可惜事實啱啱相反，唔少政客不務正業，胡混度日，唔係流會就係拉布，唔係擲物就係爆粗，有人連會都唔開，有人開會睇AV，畀人趕出會議室仲可以提早收工添。議事堂烏煙瘴氣，港府施政寸步難行，香港競爭力每況愈下，官僚無能固然要負主要責任，而政客有破壞冇建設，條數又點計吖？

咪以為淨係反對派政客不務正業，建制派亦唔好得幾多嘅咋，去年政改甩轆，咪就係典型例子囉。難怪有人話凍薪係便宜咗佢哋，港府應設立減薪機制至係。試諗吓，如果打工仔好似呢班政客咁，早就豉椒炒魷喇，點可能繼續享受高薪厚祿喎。

話時話，當局今次大幅增加議員資訊科技開支津貼，美其名鼓勵議員利用資訊科技服務市民，其實咪又係畀機會議員胡亂揮霍。呢，去年本報調查發現，議員濫用津貼情況嚴重，有人一個月內密集式購買多部名牌手提電腦，有人連雪櫃及空氣清新機都唔放過，簡直貪得無厭。所以話，服務市民係假，個人享樂至真。

正如李超人話齋，黃台之瓜，何堪再摘。九月立法會換屆，選民真係要帶眼識人，好好利用手中一票將垃圾政客踢出立法會，如果唔係，香港只會繼續沉淪，叮！