邢嘉倩（左）孖住好友曾昭怡齊出席藝術創意展覽。
前晚喺中環有個空中藝術創意展覽開幕，吸引好多城中名人參觀，例如佗緊BB嘅邢嘉倩就同好友曾昭怡一齊嚟。邢嘉倩話係嚟欣賞藝術兼胎教，希望BB將來對藝術感興趣。提起佢開辦嘅幼兒教育中心，佢話唔會攞BB做代言人，但佢就講笑話相信BB應該會對呢個身份有興趣。問到邢嘉倩會唔會開一班特別班畀一眾好朋友嘅BB讓佢哋一齊返學，佢就認為小朋友返學係接觸外界嘅一個途徑，如成日都係接觸同一班人好似唔太好喎。
羅可旋話要因材施教，令子女有快樂童年。
楊哲安（右）同太太楊張新悅會畀小朋友自由發揮興趣。
因材施教子女快樂
問到曾昭怡會唔會希望女兒將來投身藝術界，佢話BB先得五個月大，等大啲必定會帶佢參觀多啲藝術展覽。不過原來佢都心思思想經營嬰兒用品或時裝生意，但發現競爭好大，所以唔敢實行。另外，佢話等BB八個月大，就會送到刑嘉倩開辦嘅幼兒教育中心返學喎。
轉頭見到教育局前政治助理楊哲安、楊張新悅同三個囡囡，楊張新悅話三個囡囡對畫畫同跳舞都好有興趣，不過佢就冇特別希望囡囡將來喺藝術界發展，會畀佢哋自由發揮。但佢發現囡囡欣賞藝術展時，會感受到唔同嘅空間同視野。
育有三名子女嘅羅可旋都有帶小朋友嚟，佢一心認為小朋友應該係好天馬行空同喜愛鮮明嘅顏色。但大孖小時候已經成日話好鍾意黑色，因可以蓋過其他顏色，同時又好鍾意畫嘢，所以三年前畀大孖學畫畫。佢話唔會限制子女專注喺一種興趣上，會畀佢哋探索多啲，因材施教令仔女有快樂童年。
第一手消息請下載on.cc東網
