梁振英同司局長喺中聯辦逗留兩小時後，分別乘座駕離開。
現屆政府餘下一年零三個月任期，涉及民生、社福等多個深層次問題仍未解決，特別係持續困擾香港嘅假難民亂港問題，港府更被批評「麻木」、「無神經」，遲遲未提出治標又治本嘅解決方案。就喺呢個時候，本報記者直擊特首CY梁振英罕有地率領全體司局級官員到西環中聯辦，歷時逾兩小時先陸續離開，莫非一眾官員「被照肺」、要求查找不足？不過，特首辦發言人指一眾官員係出席中聯辦春茗。
張建宗
陳家強
黃錦星
昨晚六時四十五分，記者直擊政府多部座駕陸續抵達中聯辦，除咗CY同特首辦主任邱騰華外，政務司司長林鄭月娥、財政司司長曾俊華、律政司司長袁國強、發展局局長陳茂波、財經事務及庫務局局長陳家強、勞工及福利局局長張建宗、政制及內地事務局局長譚志源等人前後腳進入中聯辦，至約九時許，眾人先分別乘座駕離開。
特首辦稱赴春茗
CY突然率領整個政府高層走入中聯辦，無論喺時機同人選方面均惹人聯想，事關北京全國人大政協「兩會」上周先結束，加上建制、泛民政黨喺九月立法會選舉嘅部署陸續曝光，而假難民亂港令人心惶惶，令人聯想中聯辦係咪要喺管治同施政方面查找不足，穩住政府未來半年施政，以免添煩添亂，影響建制派選情。不過，特首辦發言人指一眾官員只係出席中聯辦春茗，因為北京舉行「兩會」關係，所以到現在先舉行春茗。
第一手消息請下載on.cc東網
