近年嚟港獨思潮愈演愈烈，港大學生會會長孫曉嵐早前上電台節目時曾經表明港獨係可行出路，引起社會關注。有外國媒體中文網今日刊出一篇署名港大哲學系學生發表嘅文章，表明不滿孫曉嵐支持港獨，發起拒交會費行動，抗議學生會「必然會員制」。孫曉嵐就話一直以嚟都有少數學生拒交會費，唔認同與自己言論有關。

有關文章指孫曉嵐嘅言論對於港大內地生係沉重打擊，又認為港大生必須每年繳交一百四十元會費，自動成為學生會會員嘅制度並唔合理，認為有必要作出抗議。文章又話有同學已經成立「拒交港大學生會必然會費」（Resist Compulsory HKUSU Membership）嘅專頁，並已得到四百多名同學嘅支持。

孫曉嵐接受本報查詢時承認，一直都有少數學生拒交會費，睇唔到本年度數字有明顯上升，唔認同有人拒交會費同自己嘅言論有關，又話拒交會費一事暫時未有內地學生當面向佢反映喎。佢又話拒交會費嘅人將不能使用學生會福利，亦唔會享有投票權，但唔會因此而喪失學生資格。據了解，港大學生會會費係同學費綑綁式繳交，唔知學生點樣拒交會費，莫非連學費都唔交？

第一手消息請下載on.cc東網iPhone/iPad/Android/Windows Phone Apps