食品安全問題層出不窮，愈來愈多人幫襯有機蔬菜，貪佢無農藥、無化肥、天然生長吖嘛。可惜吖，如今奸商無處不在，最叻掛羊頭賣狗肉，話就話係有機，實則就無機，消費者隨時上當，喊得一句句。

唔係嚇你㗎，近日有大學調查市面出售聲稱嘅有機菜，有八成淨係喺價錢牌上寫「有機」二字，不過就冇展示任何有效證書或標籤，到底真有機定扮有機，畫公仔都唔使畫出腸喇啩。呢，早前消費者委員會測試市面蔬菜樣本，發現即使係標榜健康、低污染嘅有機菜樣本中，居然有三成七驗出含殘餘農藥，所謂「有機」，原來係危機個「機」，食你唔死算你命大咯!

在商言商，有機菜嘅價格比一般蔬菜貴好多，有人乘機博大霧魚目混珠，童叟皆欺賺到盡，實在一啲都唔出奇。再講喇，家陣話就話有相關機構為有機食品認證，不過純屬志願性質，當然係無執法權力啦，所以認證呢家嘢等同於紙老虎，得啖笑嘅咋。俗語話，只要有利可圖，殺頭生意尚且有人肯做，更何況係借有機菜過橋，唔搵人笨就奇咯。

話時話，無證有機食品賣到成行成市，已經去到劣幣驅逐良幣地步，單憑肉眼或產品價錢，莫講話普通市民啦，連行內專家亦搲晒頭，未必能分辨出真偽。曾經有人建議當局盡快加強監管，落實推行標籤制度，完善有機市場嘅規範及發展，點不知官老爺借咗聾耳陳隻耳咁，睬你都傻。香港自詡國際大都會，連蔬菜有機定無機都無王管，同第三世界相差無幾，講起都失禮死人。

唔通無機扮有機欺騙消費者，真係無王管？理論上係有嘅，根據《商品說明條例》，涉及虛假陳述可構成犯法，奈何法例對「有機」冇確切定義，加上蒐證困難，結果法例形同虛設。反觀喺美國、日本以及歐盟等地，一早已立法嚴格規管上市貨品，冇通過認證而自稱有機上架販售即屬違法，立即可以拉人兼封艇，嚴刑峻法之下，梗係冇人敢膽粗粗渾水摸魚以次充好喇。

所以話，外國月亮未必特別圓，但人哋條命同健康的確係特別矜貴，就珍珠都冇咁真，港人恨唔得咁多嘞。香港亂象多多，依家搞到市民連食棵菜都提心吊膽，港府口中嘅「民生無小事」擺到明係虛假、具誤導性陳述啦，唔知可唔可以告政府違反《商品說明條例》呢何，叮！