政壇：打工皇帝李小加又加人工
港交所行政總裁李小加人工一直係市場焦點，尋日港交所出年報，呢位超級打工皇帝嘅人工亦揭盅。舊年小加總裁嘅合計酬金（包括底薪、表現花紅、股份獎授、福利等）高達4,522萬元，較一四年度嘅4,090萬元，上升10.5%。
李小加舊年嘅人工加咗一成。（資料圖片）
睇番個Breakdown（分類），原來小加總裁舊年底薪由865萬元加到900萬元，表現花紅就由1,009萬元加到1,500萬元；但股份獎授（即係以股份支付嘅酬金福利）就由2,091萬元微減100萬元，至1,991萬元。
記得市場對小加總裁一四年度人工「過四」（四千萬元）之前已嘩嘩聲，如今一五年度再加一成……大家其實唔使大驚小怪，事關唔好唔記得一四年滬港通成功開通，而一五年四月港股出咗個「大時代」嚟，港交所豬籠入水，小加總裁份糧自然水漲船高。
至於港交所主席周松崗，舊年於港交所的董事袍金亦高達313萬元，按年上升32.5%。
