政壇：搞搞政：教育局內憂外患 吳得掂眾叛親離
上任三年零九個月嘅教育局局長「吳得掂」吳克儉，捲入嘅風波不計其數，除被指喺教育政策層面實績欠奉，連處理局內人事關係都疑似「亂作一團」，更陷入眾叛親離嘅局面，餘下年零任期真係自求多福嘞！
吳得掂喺一二年七月上任後，處理德育及國民教育科爭議一鑊粥，舊年處理小三全港性系統評估爭議時被批唔願意聽意見，寧可去日本睇紅葉，都唔出席立法會公聽會，再加上上周末出席一間中學校慶活動後，被質疑喺私家車上玩手機都唔落車接收學生請願信，再次成為多方批評嘅目標，更有意見要求佢問責下台。
儘管如此，正如吳得掂佢日前反駁質疑指「欲加之罪，何患無辭」，佢向來自我感覺良好，有傳佢歸咎部分問題嘅原因同部分同事能力有關。據聞佢身邊同事嘅不滿情緒，亦如雪球般不斷滾大，首先係佢上任後僅兩個月，有傳同前新聞秘書李黎式暉不咬弦要求換人，官場其後又傳出佢同時任常任秘書長謝凌潔貞，不論處事手法同政策觀點都南轅北轍，最後謝太亦獲調至另一政策局工作。
傳陳天柱頂唔順出走
最新一個出走嘅就係被視為局長「大內總管」嘅政務助理陳天柱，政府尋日公布陳天柱會接任灣仔民政事務專員，並喺今日正式履新。官場消息指陳天柱嘅離開唔尋常，事關政務助理屬於局長近身之一，事無大小都有份處理，慣例亦會做起碼兩、三年，但據知陳天柱只係做咗不足一年，頂唔順吳得掂要求出走嘅傳聞不脛而走。
另有官場中人分析，陳天柱現年四十多歲，如果真係頂唔順上司，轉換崗位都係出路之一，事關如果蹉跎歲月，搞唔好隨時阻礙升職前途，相反出任被外界視為發揮機會較多嘅民政專員一職，似乎成功轉換跑道屬明智之舉。至於接替陳天柱個位嘅，係剛離任商經局首席助理秘書長嘅余健強，唔知佢喺新崗位能否殺出一條血路呢？
