政壇：人家開拖累死醫委會
日前我哋講過改革醫委會嘅《2016年醫生註冊（修訂）條例草案》，因泛民主派轉軚可能被拖死，尋日草案委員會開波就「開拖」，因為身為醫生嘅公文袋郭家麒爭做主席，惹起倡議改革嘅富貴黨「兩蚊張」張宇人極度不滿，跟住仲互轟有利益衝突添！
草案委員會尋日召開首次會議，富貴黨嘅方剛當選主席，而建仔嘅陳恒鑌喺無對手下當選副主席。兩蚊張即發炮點名批評郭家麒同其他泛民議員，經常企喺道德高地，又話郭係一名私家醫生，明明了解唔少市民對私家醫生有不滿，政府先作出相關修訂，批評郭仍要爭做委員會主席，係「離晒大譜」。呢次修訂會令醫委會新增四名業外委員，兩蚊張話醫生突然搵出罅隙，話不滿該四名委員要由特首委任，依家醫委會直選嘅位置都係「自己選自己」，其實都係「圍威喂」。
斥「怪醫」想拖倒條例
跟住又辣埋醫學界嘅「怪醫」梁家騮等人批評修訂會導致委任多於直選，影響自主，其實真正嘅目的係想拖倒條例。佢話海外醫生考執業試合格率只有四成，認為執業試有問題，質疑係咪「特登肥晒啲人」，讓執業嘅私家醫生繼續受保護收天價，講完就申報佢女兒同女婿係外國執業醫生，擺明係怕畀人執佢有利益衝突喇！
郭家麒就反駁，指兩蚊張係食物安全及環境衞生事務委員會主席，同時亦係飲食界人士，但亦冇指摘佢只睇飲食界利益，何需喺度抹黑他人，又指佢女兒同女婿未能回港行醫，亦從冇作為口實，質疑佢點解要攻擊其他議員。郭指自己係私家醫生，但做事亦從來唔係為咗維護私家醫生嘅利益，指現時監警會等組織都被安排特首支持者作成員，難以令人信任，批評若有特首委任業外委員，就會有「黑手」壓制某啲專業。
當日同富貴黨一齊撐改革方案嘅白鴿黨「AV仁」何俊仁就話，若想通過條例草案，應盡可能尋求共識，唔應該講說話刺激撕裂同惡意針對，仲重申對由特首直接委任業外委員有好大意見。兩蚊張即刻澄清話唔係想挑起紛爭，只係對近來發生嘅事發表意見，佢又認為增加四名業外委員，係攞出共通數，希望踏出第一步。
今屆立法會嘅會期只剩番四個月，睇泛民同建制咁鬥法，呢條草案都係凍過水咯！
