曾幾何時，香港經濟發達，百業興旺，「購物天堂」美譽蜚聲國際；可惜時移勢易，家陣嘅香港經濟凋敝，市道蕭條，各行各業叫苦連天。呢，連李超人亦慨嘆，目前香港經濟為二十年來最差，冇一個行業好，甚至差過沙士時，都咪話唔大劑。

唔係誇張o架，外圍環境欠佳，全球經濟唔掂，尤其中國增長放緩，香港都幾難獨善其身。加上香港本身問題多多，旅遊業面對寒冬，零售業無以為繼，連累成個消費市道，人人勒緊褲頭，連大財團亦叫苦連天，小商戶更加水深火熱。可以見到，近年商戶執吓一間又一間，農曆新年後結業潮更愈演愈烈，搞到吉舖處處，商場十室九空，睇見都淒涼。

本來呢，面對咁惡劣嘅時勢，大家應該共度時艱至係，點知事實啱啱相反，有啲業主唔肯減租不特止，反而逆市加租，令小商戶雪上加霜，紛紛結業離場。好似大埔一個舊式街坊商場咁吖，有小商戶居然被加租三成，你話點樣經營落去吖？除咗結業之外，仲有乜嘢選擇吖？

即係咁，香港係自由市場，業主在商言商，爭取最大利益唔出奇，問題係，依家營商環境係二十年來最差，小商戶本小利微，本來已經好難經營，再遇上業主飛擒大咬，辛苦賺埋都唔夠畀租，咁即係將小商戶趕上絕路嘅啫。俗語話，留得母雞在，哪怕無雞蛋，業主一味殺雞取卵，最後只會連雞蛋都冇得食嘅咋。

屋漏偏逢連夜雨，本港經濟不妙，前景暗淡，偏偏社會愈來愈政治化，有人成日搞風搞雨，更加令香港衰多幾錢重。大家有眼見，反對派政客大搞不合作運動，經常無事生非，拉布流會成為家常便飯，導致議會空轉，施政癱瘓。而更恐怖嘅係，隨着激進勢力抬頭，本土化及港獨思潮不斷蔓延，社會愈來愈暴戾，連大年初一都爆發暴動，香港由動感之都淪為動亂之都，你話點可能有運行吖。

難為港府仲話要集中精力處理經濟及民生問題，結果得個講字。咁又難怪嘅，港府一味捱打，自身難保，連本來冇乜爭議嘅版權修訂條例都要跪低，所謂集中精力處理經濟及民生喎，吹水就得！

正如李超人話齋，黃台之瓜，不堪再摘。香港頭頭碰着黑，各行各業冇啖好食，如果繼續內鬥內耗，家嘈屋閉，盞死路一條嘅咋，叮！