政壇：搞搞政：港島新東選戰 白鴿內鬥連場
九月立法會選舉嘅前哨戰已拉開序幕，民主黨（白鴿黨）內部亦暗鬥不停，港島區同新界東嘅名單先傳出中西區區議員許智峯（峰鴿）同總幹事林卓廷（阿廷）跑出機會較高，但原來選足四屆區議會都落敗嘅「黑仔王」莊榮輝亦有心，仲落力拉票。峰鴿同阿廷面對黨友追啄，講出線？仲有啲早。
白鴿黨現任議員單仲偕決定退下火線，騰出咗港島議席，原以為峰鴿可以自動出線喇，點知最後階段，莊榮輝決定參選。莊直言，出選目的係唔想港島選區冇競爭，仲細數自己有三大優勢：首先係親和力大；其次係佢喺區內主打反圍標，已親身接觸過港島一百座私樓約一萬名業主；最後係講到要激，其實佢都可以好激，似乎想話唔係峰鴿先識激。
至於新東嘅席位，亦傳去年加入白鴿黨嘅變性人梁詠恩（Joanne）有興趣，仲話同區雖有人民力量陳志全（慢必），但慢必參選時唔係主打平權，當選後先至公布性取向，所以睇好自己若主打同志議題，吸票能力會大過慢必。點都好，白鴿黨將喺下月中旬同下旬分別舉行支部及黨大會，屆時決定出選名單。據傳，該黨九龍東同九龍西鐵定由現任議員胡志偉同黃碧雲分別競逐連任，至於新界西就係副主席尹兆堅同元朗區議員兼小說創作者鄺俊宇之爭。
