政壇：何東堂校友 憶豆蔻年華
創校百年嘅香港大學舍堂有濃厚文化氣息，其中何東夫人紀念堂有別近年港大新建宿舍嘅男女同宿，保有唯一嘅女生宿舍，連港大行政及財務副校長康諾恩（Steven Cannon）都覺得好神秘，笑言至今都未有機會踏入過何東堂喎！
鄺心怡（左）同蔡炫中回憶當年點樣玩利瑪竇堂男生。
梁安妮搵到當年盛裝出席晚會嘅舊照，相當興奮。
尋日港大舉行舍堂六十五周年開幕典禮，邀得香港建築師學會首位女會長鄺心怡（Anna）、九龍醫院前行政總監蔡炫中、有「煙花王后」之稱嘅恒信公關創辦人梁安妮（Annie Bentley）等著名舊生分享當年點滴。因何東堂毗鄰男生宿舍利瑪竇堂，故締造多段良緣。Anna同蔡炫中曾一齊住何東堂，憶述當年，原來佢哋成日要求利瑪竇堂男生跑落西營盤水街買雪糕。
Annie就話，何東堂生活造就佢識到住喺利瑪竇堂嘅初戀情人。著名導演張婉婷係佢當年嘅「樓姊妹」，Annie自言當年有份說服張婉婷重返何東堂拍《玻璃之城》，係何東人必睇電影。
