政壇：法律界男神 自信廚藝得
成立一年多嘅「法政匯思」尋日搞傳媒茶敍，乘機介紹幾位唔同法律專長嘅發言人。講明係茶敍，食物當然不能少，於是由一班律師親自下廚。款式由街邊小食咖喱魚蛋到英式鬆餅都有，算係有板有眼。「法律界男神」梁允信（Wilson）就即場炮製日式蒸蛋，但今次只係佢第二次下廚咋，真係嚇親人。
梁允信（前右）、任建峰（前左）同一班手足親自炮製食物搞茶敍。
Wilson自稱今次已進步好多，仲話烹飪係佢嘅專長喎，睇嚟佢相當滿意，但係有人試過就覺得一般喇！召集人任建峰（Kevin）都對一眾兄弟嘅手藝無乜信心，事先聲明希望唔好食到大家食物中毒喎！
講起九月立法會選舉，唔知法政匯思會唔會派人競逐呢？Kevin就話唔會，除非佢離婚先會參選喎！至於競逐選舉委員會同樣未有打算，不過Kevin透露組織內有人想參選，但唔會以法政匯思名義，暫時組織會以關切社會議題為重。
