接二連三壞腦 香港郵政離譜

即係咁，年紀大，機器壞，香港郵政壞腦死機，本來唔出奇，只要肯認錯，盡快搶修，市民未必會咁火滾。最離譜嘅係，郵政官僚唔止唔肯認衰，仲藉口多多，話各郵政局進行電腦系統工作，暫時改以手動模式處理櫃位交易，排隊輪候時間會較長喎。

嗱，呢啲咪就係死撐囉。唔理你係進行電腦系統工作，或者係壞腦死機，總之凡係影響服務，就要清楚交代，唔可以語焉不詳，遮遮掩掩。正所謂，唔怕唔識貨，最怕貨比貨，最近超級圍棋電腦程式AlphaGo威風八面，將世界級棋王殺到片甲不留，反觀香港郵政嘅所謂綜合郵務電腦系統，二○一四年至推出，咁快就問題多多，話壞就壞，話冧就冧，認真羞家。

正如有立法會議員話齋，一次壞機就話係偶然啫，電腦系統三日唔埋兩日出事，今次已經係三個月來第三次，絕對唔正常。更匪夷所思嘅係，香港郵政吹到呢套電腦系統幾咁先進，點知居然冇後備及應變措施，一壞就全部跪低，仲有冇兒戲啲吖。好明顯喇，香港郵政嘅電腦系統好似豆腐渣工程咁，除咗反映日常管理甩漏，保養維修不足，亦可能係做咗羊牯入錯貨，如果唔係，點會好似撞邪咁吖。

唔係誇張㗎，近年香港郵政烏煙瘴氣，七國咁亂，鑊鑊新鮮鑊鑊甘，唔係撞邪又係乜吖？有辦你睇，香港郵政衙門小小，醜聞多多，數極都數唔晒。本報曾踢爆郵政連串管理亂象及大花筒醜聞，包括集體蛇王呃補水、頻頻失信於民等等；而審計署亦揭發郵政經營不善等十宗罪，立法會帳委會更發表報告狂數郵政管理不善等罪狀添。可惜吖，郵政官僚勝在面皮夠厚，完全當審計報告冇到，連立法會帳委會嘅「遺憾」都闊佬懶理，簡直唔知個醜字點寫。

冇計喇，講又唔聽，聽又唔明，明又唔做，做又做錯，錯又賴人，正正係郵政官僚嘅最佳寫照。計太一叮話齋，香港郵政長期虧損，流血不止，反正醫番都嘥藥費，不如諗辦法徹底改組甚至索性摺埋，一來唔使再浪費公帑，二來唔使繼續篤眼篤鼻，叮！