年輕人創業困難多,好似早前喺稻苗學會新春團拜上,見到叙福樓集團執董Simon黃傑龍,佢話有年輕人曾同佢訴苦,話開新公司時想開個銀行戶口困難重重,令Simon諗起旗下每個唔同名嘅食肆都會開銀行戶口,但銀行每次都要佢哋畀好多文件才批核,半年先開到個銀行戶口真係平常事,佢咁有經驗都覺得繁複,何況係創業初哥?

黃傑龍(左)話感受到年輕人創業困難之處,右為「幟哥」黃永幟。

盧有芬(左起)、程少儀同鄭肇琪分享入行經過。

邱金榮(中)搵稻苗學會兩位年輕成員安偉山(左)同李俊婷擔任司儀。

Simon話年輕人創業開銀行戶口,銀行除咗要求財務報表外,仲要佢哋提供與客戶嘅生意合約證明,但係對創業新手嚟講,未有戶口就先要有客戶合約都有一定難度,佢認為政府可以研究吓有乜嘢方法放寬或提供協助,等年輕人創業之路少啲障礙。

拍膊頭文化唔要得

不過,創業難守業更難,筲箕灣安利魚蛋粉麵後人鄭肇琪就分享當年讀完書,應家人要求返舖頭幫手嘅經過,佢認為要保持競爭力,就要一改過往「拍膊頭」遲到早走嘅文化,無論對老師傅或年輕一輩員工,都要一視同仁,咁先可以令人信服。

身旁Simon仲大爆早前幫襯安利有驚喜,因為鄭肇琪特製咗份「生日多」(鮮油奶多)畀佢做生日蛋糕。而鐵板超負責人盧有芬入行係因為有次睇唔過眼廚師煎魚太燶,自己學埋一份,點知最後入埋行添!

當晚出席團拜嘅除咗主席邱金榮外,仲有「幟哥」龍皇酒家飲食集團主席黃永幟同聯邦酒樓董事執行經理程少儀等。點解會咁遲先團拜?邱金榮解釋,通常飲食界都要先招呼晒啲客仔,過咗最忙嘅檔期後,先可以輪到自己慶祝喎。

第一手消息請下載on.cc東網iPhone/iPad/Android/Windows Phone Apps