政壇：選新東提早開戰 陳雲暗踩梁天琦
喺上月立法會新界東補選，曾為本土民主前線梁天琦站台嘅本土派學者「國師」陳雲，日前突然喺facebook留言指「香港人」定義就係「香港永久居民」，若定義為「甚麼普世價值、香港價值、香港文化」，都係「廢話」，呢種定義亦係壓迫自由，相關言論明顯係狠插最近以擁護「香港價值」就係香港人嘅梁天琦。陳雲同梁天琦均有意出戰九月立法會新界東選舉，莫非陳雲此刻已提早開戰？
陳雲
梁天琦月初被網民大起底，踢爆佢唔係喺香港出生，係「大陸喱」扮本土派。當時梁天琦承認並非香港出生之餘，亦為「香港人」同「本土派」重新定義，認為邊度出世無大不了，只要擁護廣東話、香港價值就係香港人。咁樣睇嚟，陳雲嘅留言明顯係衝着梁天琦而嚟，指梁天琦嘅香港人定義係「廢話」，係壓迫同違反自由。
梁天琦喺上月底新界東補選獲得六萬六千票，一方面為本土派振聲威，但亦令本土派內部「心雄」，九月大選蜂擁出戰，表明出戰新界東嘅陳雲同梁天琦勢必成為對手，喺僧多粥少下，自然互相廝殺搶票。
