大家都知道新民黨主席葉劉淑儀向來崇優,黨員唔係尖子就係專業人士,轄下嘅青年委員會亦唔例外,好似剛上任青委會副主席嘅Gigi王政芝,仲有盛傳會參選九月立法會新界東選舉嘅「翻版吳綺莉」Eunice容海恩。最近青委會改選,葉劉再引入「高富帥」副主席Michael廖子聰,一米八八身高,配合倫敦國王學院生物化學系學士學歷,加上從事人民幣外匯經紀,成個「package」已經冇得輸。

王家揚(中)率領王政芝(右三)、廖子聰(右一)等青委會新班子現身。

最近改選嘅新民黨青委會,由執業會計師Roland王家揚接任主席,前晚率領六名副主席見傳媒。講起Michael呢位新丁,可謂資深「沙田友」,笑言自細飲城門河水大,中學時代更曾入選沙田區籃球隊,同Eunice一樣都係透過公民力量入黨,相信可以喺選舉助Eunice一臂之力。

除咗Michael,其他副主席好似葵涌醫院精神科醫生葉沛霖都粒粒皆「專」,Roland話近年各政黨都積極換血,青委會目標係幫葉劉擴充現時約二百人嘅青委會規模,其中六月回港嘅葉劉囡囡Cynthia更係佢哋頭號招手對象之一,亦會關心青年及其他公共政策議題。不過,佢哋個個「贏在起跑線」,發表意見時唔好咁離地至得喎。

第一手消息請下載on.cc東網iPhone/iPad/Android/Windows Phone Apps