政壇：高鐵玩殘錦鯉 曾蔭權自食其果
尋日立法會財委會討論多項工程撥款，議員郭家麒喺追問蓮塘/香園圍口岸及廣深港高鐵香港段工程嘅特惠補償金撥款時，提到牛潭尾村落有好多從事種植同開設錦鯉養殖場，「你以前老細曾蔭權啲鯉魚都係放喺嗰度」，但因為高鐵工程不斷抽走地下水，令錦鯉「死得就死，病得就病」，將好多村民嘅一生心血化為烏有。
有議員爆料話曾蔭權（右）啲錦鯉放咗喺牛潭尾村嘅錦鯉場，受高鐵工程影響「死得就死」。（資料圖片）
眾所周知，前特首曾蔭權爵士最愛養錦鯉，無論喺任職政務司司長或特首時，都濫用公帑喺官邸興建大型魚池飼養錦鯉，閒時仲騎呢到會同啲錦鯉傾心事。佢卸任特首後，一直住喺多層大樓，冇地方容納大型魚池，據聞將所有錦鯉留咗喺禮賓府冇帶走。
郭家麒尋日話曾爵士啲錦鯉放喺牛潭尾錦鯉場，唔知係講緊曾爵士以前啲錦鯉係喺嗰度購入、定係佢離開禮賓府時將部分錦鯉寄養咗喺當地嘅錦鯉場呢？若果係後者，咁曾爵士真係自食其果喇！因為高鐵工程係喺佢任內提出嘅。
