政壇：泛民轉軚 改革醫委會恐流產

早喺前年三月，白鴿黨同富貴黨聯手向食物及衞生局提出改革醫委會，包括將有限度註冊醫生時限延長至三年，以及增加醫委會內非醫生委員數目。及至舊年十月，富貴黨張宇人率先提出私人條例草案，加入四名非醫生委員。食衞局眼見各黨派都支持草案，之後就自行吸納，由局方提出草案。

憂損專業地位 醫學會急游說

但醫學界一向都專業自主，政府一旦動搖業界嘅專業地位，好自然會反彈。據了解，醫學會落足嘴頭游說各黨派，反建議業界同非業界委員各增加四名，兩者比例維持一比一。當中泛民係醫學會最大游說對象，並以一旦原草案獲通過，特首可以委任「自己友」取代業界聲音，所以班泛民立場開始動搖。

有建制派留意到泛民至今有十三人加入法案委員會，但建制派只得七人。咁反映咗乜嘢？以往呢啲法案委員會係各黨派出代表加入，好少咁「冧友」加入，加上建制派聽聞泛民想推舉醫生郭家麒做法案委員會主席，喺雙方互信不足嘅情況下，懷疑泛民想轉軚支持醫學會嘅反建議。

白鴿黨「AV仁」何俊仁話該黨唔同意由梁振英直接委任醫委會委員，如果係由大學、專業團體間選就可以；黨友單仲偕亦承認草案有爭議性，認為醫學會方案、以至醫學界議員梁家騮提出業界同非業界委員各增加六名委員嘅方案，都有道理。醫學會加強游說，加上立會會期即將屆滿，按此形勢，草案隨時有流產風險，睇嚟食衞局局長高永文要出力點至得喇！