政壇：陳克勤執死雞做召集人

建仔主席李慧琼辭任行政會議成員，引起人事變動嘅骨牌效應，佢嘅繼任人葉國謙尋日宣布辭任黨團召集人，由陳克勤執死雞頂上，遲吓分分鐘接手埋立法會建制派「班長」一職。下月先至滿四十歲嘅克勤仔，從政近十七年，威水史欠奉，反而瘀事笑料多籮籮，搵佢管住黨員同埋協調投票意向嘅重任，建仔係咪未知驚呢？

「Try our Breast」笑足八年

九九年區議會選舉時，克勤仔以二百幾票險勝，成為沙田區區議員，當時以二十三歲之齡成為香港史上最年輕區議員，但只做一屆就連任失敗，其後挑戰立法會議席同樣失敗而回。

及至○六年，佢獲聘為行政長官辦公室特別助理，點知克勤仔話返工第一日，要先去學影印，結果就被嘲笑係「影印仔」。

兩年後，克勤仔終於成功躋身立法會，但接受訪問時又鬧出笑話，兩度將「Try our best」（盡我們所能）講成「Try our Breast（乳房）」，英語水平備受嘲諷，至今被笑足八年，真係丟盡母校中文大學嘅顏面。

可能建仔自知笑料百出嘅克勤仔唔止喺黨內地位唔夠，喺建制派一班資深政客之中，更加只算係「嘴上無毛」之輩，所以葉國謙並無交出全部「兵權」，仍然兼任建制派「班長」，但只能頂埋呢幾個月，皆因佢已表態唔會再尋求連任。

儘管外界惡評如潮，但係克勤仔就話現時議會複雜多變，要做好黨團召集人唔容易，所以會讀熟議事規則，加強與各黨派及政府嘅聯繫喎。