有「皮革世家」之稱嘅意大利品牌早前邀請咗八位時尚名人拍攝相片集同影片。品牌前晚舉行咗相片集exhibition，其中五名有份參與嘅名人包括Moiselle創意總監Harris陳栢熹、周國勳女兒，珠寶首飾製作企業總經理Chelsea周穎詩、富商曾文豪女兒Adelene、本地印度裔富商夏利里拉家族後人Nadia、同埋香港賽馬會前主席黃頌顯外孫女Caroline李家敏都有到場支持。

陳栢熹話輯相好有藝術感。

Nadia指攝影師捕捉到佢最真嘅一面，所以輯相好代表到佢。

Harris其中一張相係要喺半空中跳起，佢話：「影嘅時候都跳咗半個鐘，攰㗎，不過對鞋好舒服。我覺得輯相好有藝術感，展現出品牌嘅product可以有好多唔同嘅造型，適合唔同個性嘅人。」跟住佢又話：「我鍾意時裝，工作需要時會貪靚，唔使工作平日衣着就係T恤加條褲，舒服對我嚟講係最重要。」他又透露簽咗韓國嘅partner，會喺韓國發展時裝生意。至於可會考慮找個韓國女友，佢話：「乜嘢國籍都無問題，但暫時未遇到好合適同埋令我好熱衷去發展嘅女仔。我唔急，係我爹哋媽咪急，日日都催，直情喺公司啲ball度上台拎住個咪問有無女仔想同我結婚，我都會覺得尷尬，不過同時亦都慣咗。」

而Nadia就同模特兒好友陳瑞瑩一齊到場，Nadia話：「我好鍾意呢輯相，成個團隊都好專業，我單人相嗰part影咗二十分鐘就完成。成班人一齊影時，攝影師又會捕捉到我哋最真嘅一面，所以輯相好代表到我。」佢透露現在專注發展事業，未有拍拖。

第一手消息請下載on.cc東網iPhone/iPad/Android/Windows Phone Apps