城中鏡：抗壓要趁早

李文斌認為現時社會競爭激烈，有壓力係無可避免，如果仔女去到大學甚至出社會工作時先發現唔識得面對壓力，到時會更難處理，倒不如等佢哋自細養成面對挑戰嘅習慣同正面思維。佢不時都會留意仔女情緒狀況，小朋友習慣咗後知道完成好目標就可以去玩，都顯得非常積極，佢又會讓女兒話事，入讀心儀學校。

轉頭見到青年工業家協會基金會常委顏吳餘英同老公顏培英及兒子兼百仁基金副主席顏志永，講起以前讀書有無壓力時，顏志永就笑笑口話好彩細個時父母忙於打理生意，由婆婆負責照顧佢，所以讀書方面父母都無乜畀壓力佢。顏太就話以前嘅人無咁緊張仔女分數，個仔升到班就得，又笑個仔好怕死，所以唔使擔心佢做傻事喎。

鄭錦鐘少畀仔女意見

保良局前主席鄭錦鐘就話慶幸幾個仔女讀書成績方面都唔錯，毋須佢操心，亦無要求仔女一定要學啲乜嘢興趣班，但佢認為現時年輕人壓力來源可能係多方面，但「謀事在人，成事在天」，有時好多嘢唔係話計劃好就一定有理想結果，所以佢甚少對仔女嘅事畀意見，希望佢哋有較大自由度發展。