政壇：袁彌明避走日本買樓
近排香港政治形勢七國咁亂，移民潮報道不絕，人民力量主席Erica袁彌明自舊年區議會選舉後冇乜聲氣，只係間中見佢喺社交網站宣傳自己盤生意，同埋就立法會新界東補選留言，原來佢同老公林雨陽舊年靜靜雞喺日本置業，唔通佢都厭倦政治，想避走日本？
袁彌明夫婦日本新居坐落六本木高尚住宅區。 （受訪者提供）
袁彌明夫婦日本新居坐落六本木高尚住宅區。 （受訪者提供）
其實Erica無意退出政壇，更加唔係移民日本，只係有感成為公眾人物後，喺香港放假都好難真正休息、放鬆，加上本身好鍾意日本，每年平均去四次，所以舊年初遊日時順便睇樓，四月扑槌喺外國駐日領事館聚集嘅六本木置業。佢話選址六本木係貪該區屬當地高尚住宅區，但樓價兌港元只係約一萬元一呎，絕對抵買，最重要係大廈接待處職員識講英文，好快將日本成為第二個家鄉，平日單位就讓畀親友去日本旅行時入住。
一直有傳Erica九月會代表人力轉戰立會香港島直選，屆時可能要同熱血公民鄭錦滿同學聯秘書長羅冠聰等激進派搶票，如果屬實，睇怕Erica無乜時間享受間新屋喇！
