話說學民思潮（學民）喺本周初爆出解散傳聞，主要成員同發言人至今未有否認，更有傳學民不日就會宣布將組織一分為二，以新政黨同新學生組織形式繼續運作。但消息傳出不久，即有疑似前學民成員喺網上爆料，指學民打算將以百萬元計嘅資產分一半至新政黨，質疑學民「呃錢」！
網民：會章話點就點
該疑似前學民成員質疑，市民係向學民捐款，而唔係捐畀新政黨，唔明點解可以問都唔問就拎走一半資產，佢又要求召集人黃之鋒、發言人黃子悅交代資產去向。黃子悅喺網上留言回覆，指「根據會規，資產將捐給理念相同的組織」，即被質疑係暗示將資產轉去新政黨，亦從來無將會規向外公開，「會章佢哋話點就點」，多名網民更斥被「呃錢」！亦有網民關心現時月花二萬元租用嘅會址將如何安排。
本報至截稿仍未聯絡到黃之鋒或黃子悅等人。黃之鋒尋日接受數碼電台訪問時話，現時學民有百多萬元資金，每月有核數師覆核戶口財政，又話背後無政治勢力支持，但未有回應「呃錢」指控。不過，根據舊年三月時任學民發言人嘅黎汶洛所講，學民當時約有二百五十二萬元儲備，唔知點解一年間會使咗百多萬元？
第一手消息請下載on.cc東網
