劫殺案接二連三 假難民亂上加亂

呢，繼油麻地便利店東主被越南籍疑兇以利刀插胸，最後不治身亡，大埔日前亦出現恐怖劫案，一名找換店主被一名戴口罩劫匪尾隨闖入，最後慘被割喉放血，傷重不治。可以見到，找換店內一片凌亂，店外遺下十四個恐怖血鞋印，令人不寒而慄。

店舖光天白日被打劫，店主被害命，咁叫做安全城市咩？正所謂，盜亦有道，以前劫匪一般只求錢財，不傷人命，家陣居然郁啲就傷人，郁啲就攞命，治安惡化到乜嘢程度，可想而知喇。今時今日香港盜賊橫行，劫案頻生，你話究竟係乜嘢世界吖。

正所謂，綿綿不絕，必有亂結，本港治安不斷惡化，罪案無日無之，呢兩宗劫殺案只係冰山一角咋。香港呢幾年唔知撞咗乜嘢邪，社會唔止愈來愈暴戾，而且法治觀念愈來愈淡薄，卒之咪淪落到咁嘅地步囉。正如有人話齋，劫匪居然為咗一包薯片涉嫌殺人，何止係治安不靖嘅證明，更加係法治沉淪嘅證據。

更令人擔心嘅係，假難民問題愈演愈烈，罪案無日無之，好似一個隨時爆炸嘅炸彈咁，搞到市民惶惶不可終日。係人都知，絕大部分假難民來港嘅目的係食大茶飯，佢哋膽正命平，無惡不作，部分甚至淪為黑幫爪牙，無法無天，治安想唔惡化都難喇。呢，由於最近珠三角缺工嚴重，有人將南亞人蛇一批批咁轉運到當地打黑工，然後伺機偷渡來港，再咁落去，香港遲早陸沉都似。

假難民嘅威脅唔止呢啲o架。近日網上流傳迪士尼樂園有疑似南亞裔拐子佬出沒，懷疑想抱走一個嬰兒車上嘅BB，問你怕未。

正所謂，眾怒難犯。尋日多個政黨示威請願，批評假難民淪為社會治安嘅巨大隱患，促請港府盡快拆彈，包括研究退出《禁止酷刑公約》或規定聲請者必須喺半年內提出證明等。冇錯嘞，香港治安已經夠惡劣，加上假難民源源不絕而來，唔七國咁亂至奇吖。

無論點講都好，本港接二連三發生劫殺血案，已經為治安敲響警號，如果港府繼續視而不見，闊佬懶理，香港終有一日變成「全球最危險城市」o架，叮！