大搜查：運動成職業前景黯淡
要將運動變成職業，在香港似是天方夜譚。有家長表示，子女曾揚言將來要當職業足球員，惟他只能「潑冷水」着他好好讀書，坦言「好矛盾」。有港隊球員亦稱，「政府資源超級唔夠」，讀書時見有同學因為要應付考試而退出校隊。
香港女子足球代表隊隊員葉婉彤（右）稱，政府在體育資源投放「係超級唔夠」。（資料圖片）
「資源投放超級唔夠」
香港東區家長教師會聯會主席趙明稱，「我個仔有次話想做個職業足球員，但我都只可以同佢講，當興趣好喇，要讀好書先，因為我暫時都睇唔到個前景」。他指，政府對運動項目的支持不足，設施資源亦唔夠，「好多時某種運動一時間好hit，政府就會全力支持，話會做得好好，但最後都係到喉唔到肺，不了了之」。趙又表示，「如果政府有成套計劃，畀家長睇到有個好好嘅前景就會放心。除非個家庭本身背景好，可能都會放手畀佢去，但一般家庭唔會。」
現為香港女子足球代表隊、效力公民任後衞的葉婉彤表示，「政府在體育資源投放係超級唔夠」，亦因為踢波「轉過幾份工」，即使是代表香港出賽，「政府都冇理過我哋，場都要自己book」。她又指，當初選擇當業餘足球員，曾遭家人極力反對，「屋企人會覺得女仔冇咩體力，搵份高薪厚職嘅工咪算」，但她熱愛足球始能堅持。對於中小學生學業繁重而缺乏運動，她亦指「曾見過有同學因為要應付考試而退出校隊」，故希望政府可正視問題。
