城中鏡：高歌紓怒氣
港澳台灣同鄉會（同鄉會）早前舉行新一屆理事會就職禮暨周年晚宴，新任會長林華琴（Judy）成為該會成立二十七年來嘅第二位女會長，一眾台灣幫包括珠海學院校長張忠柟、國際華商協進會會長羅台秦同春風合唱團指揮曹樹華等都現身支持。曹樹華爆料話，張忠柟係該合唱團嘅男高音，唱功了得。張忠柟就搞笑話自己唱歌只為消氣，有時喺學校畀學生激親，想鬧人時就閂埋門喺辦公室內高歌一曲，極速怒氣全消喎！
曹樹華（左）與羅台秦（右）同讚張忠柟（中）唱功了得。
李廣林（右）與李豐年兩人都與台灣幫關係唔錯。
林華琴（中）接任台灣同鄉會會長，林俊杰（右）與太太林李琴齊道賀。
曹樹華話當年創辦合唱團係以台灣人為主，諗住鄉親聚會除咗食嘢傾偈，都可以唱吓歌，結果好受歡迎，依家團員有埋香港人同內地人。羅台秦就話，六月份曹樹華將喺文化中心搞一場音樂會，係慶祝國際華商協進會成立三十周年嘅重頭節目之一。
林俊杰擬搞「時間之旅」
香港嘅台灣圈中有唔少低調實業家，做鐘錶生意嘅同鄉會名譽會長林俊杰就係其一，佢話喺內地開錶廠逾四十年，亦自創腕錶品牌於香港銷售，由於太鍾意呢行，最近佢打算喺惠州搞一個名為「時間之旅」嘅文創區，旨在推廣古今有關天文、曆法同計時等嘅知識。
同場仲有博愛醫院總理李豐年同父親「糧油大王」李廣林，佢哋入口好多台灣靚米，梗要嚟捧場。新上任嘅Judy最關心嘅始終係慈善，佢話早前一班同鄉聯手為台南地震災民籌款，成績唔錯，下個月佢將返台灣親身將善款送到災民手中。
