政壇：搞搞政：「庭」「鋒」擬跳船組黨 學民傳周日解散
立法會九月換屆選舉牽動各方，近年屢次傳出有人出走離開嘅學民思潮，連最具知名度嘅召集人黃之鋒同前發言人周庭都計劃退出，加入由學界、文化界等組成嘅新政黨，劍指九月立會選舉。不過，黃、周跳船後，學民空洞化已在所難免，下一步會唔會係摺埋？話口未完，深夜時分已傳出學民本周日解散嘅消息。
學民成立近五年，喺一二年反國教一役冒起，此後多次於遊行籌款吸金，成為學界一股新興勢力，不過，學民中人熱心政治，據報，最近數月黃之鋒、黎汶洛等學民核心有份聯同專上學生聯會、學者同文化人等組成新黨，最快下月正式成立，首批黨員暫有二十五人。咁學民點呢？學民一向規定身為召集人、發言人唔可以同時係其他組織成員，據知，佢哋將會舉行會議，除咗討論來年計劃，另一重要議題就係商討係咪應該維持呢個規定，睇怕解散都係一個選項。
早前有消息話，學民內部有意見認為，佢哋成立目的始終唔係為參政，為咗同政黨有所區別，未必會改變現行規定，如果最終通過維持不變嘅決定，據知黃之鋒、周庭同中大神學院學生林淳軒都打算退出學民，全心投入新黨工作，學民現任發言人黃子悅暫傳有意留守。
