政壇：徐立之科研 開心靠善忘
一個人記性差，好影響學業，甚至出嚟社會做事嘅表現，不過喺科學上有重大貢獻嘅港科院院長徐立之竟然都話自己記性差！佢話自己記性欠奉，但就能夠令佢容易忘記唔愉快嘅事件，更造就咗佢嘅樂觀性格。聽佢咁講，似乎記性差都係優點。
徐立之話自己記性差，容易忘記唔開心嘅事。
徐立之尋日獲香港大學頒發名譽科學博士，讚揚佢對社會、科學同高等教育嘅貢獻。期間佢透露，喺多年嚟嘅研究工作中遇過無數挫折，但全因善忘令佢能夠從容面對，更因此可以轉眼搵到新方向，難怪記性差都無阻佢喺遺傳學上取得成就啦。
不過被問到一共擁有幾多個博士學位時，徐立之就冇答，莫非係因為記性差，諗唔起有幾多個博士學位？
最近，校園瀰漫着一片愁雲慘霧，曾任港大校長嘅徐立之就勸勉年輕人要積極面對人生，又提醒大家，挫折只係一時，而非一世嘅，希望佢嘅樂觀態度能為學生帶來正面影響啦。
