政壇：倘買羞家保險 舒娃輸少啲
保險絕對係一種創意產品，近日俄羅斯網球天后舒拉寶娃捲入服用禁藥一事，不但被罰停賽，連贊助商都即刻劃清界線，可謂傷上加傷，但原來保險界有種產品可以做啲彌補，呢種就係Disgrace Insurance（暫且叫住「羞家保險」），不過呢種產品似乎香港未係咁興。
舒拉寶娃捲入禁藥風波，贊助商如買「羞家保險」便可蝕少啲。 （資料圖片）
講起呢種羞家保險，近三年投保人多咗30%，令全球最大保險市場Lloyd's of London嘅意外保險總額推至五十五億港元。究竟呢種產品係做咩嘅呢？原來保單主要係針對產品同代言人而設，供代言品牌減少被代言人醜聞拖累嘅保障，保單可按品牌對代言人嘅信心度身訂造，保費一般不多於投保額1%，保障範圍除咗醜聞對品牌造成嘅收入損失外，仲可以包埋當倒咗落海嘅廣告支出，保險公司甚至可以為餘下廣告費用包底添。
簡言之，好似舒拉寶娃咁，形象插水後，Nike、TAG Heuer就算九秒九宣布劃清界線，都只係斬纜止蝕，如果買咗羞家保險，就輸少好多喇。
