問責官員民望沒有最低，只有更低！港大民意研究計劃尋日發表新一輪嘅特區管治班子民望調查結果，十三名問責局長當中，有六人嘅淨支持率下跌，三人不變，僅四人微升。當中教育局局長吳克儉嘅民望再度插水，有多達六成三受訪者反對佢留任，得一成六撐佢做落去，淨支持率較上月跌多四個百分點，已經記唔清係佢第幾次民望包尾，名副其實「吳得掂」！

若以跌幅計，本月仲有三名局長嘅民望跌得勁過吳克儉，分別係商務及經濟發展局局長蘇錦樑、勞工及福利局局長張建宗同民政事務局局長劉江華，三人嘅淨支持率不約而同大跌八個百分點，估計係同版權法爭議、亞視欠薪同星大光大道擴建事件有關。

整體而言，十三名局長當中有五人嘅淨支持率為負數，即係反對佢哋留任嘅受訪者多於支持，分別係吳克儉、蘇錦樑、劉江華、發展局局長陳茂波同創新及科技局局長楊偉雄。其中上任無耐嘅楊偉雄，淨支持度只係僅僅負百分之一，睇趨勢應有望升番上正數，希望佢繼續努力，至於其他幾位睇嚟就好難救得番嘞！

第一手消息請下載on.cc東網iPhone/iPad/Android/Windows Phone Apps